Wallis en Ierland laat die rugbypot kóók

Van al die gróót rugby wat dié naweek op televisie uitgesaai word, is die botsing tussen Wallis en Ierland gewis boaan die lys wedstryde waarna die fynproewers sal kyk.

Die Stormers en die Lions is wel in belangrike kragmetings in die Superreeks betrokke, maar kieskeurige ondersteuners sal seker maak hulle loop nie die Sesnasies-aksie in Cardiff mis nie. Dit is waar die beste én opwindendste rugby verwag word.

Engeland se wedstryd teen Skotland behoort self iets besonders te wees. Daarby sal die Australiese Grand Prix, motorfietsrenne in Thailand en uitklopsokker in Engeland ook skouspelagtige vermaak op TV verskaf.