Netbal sal manne dwing om voor TV plek te maak

Heelparty manne wat optree asof hulle Saterdae die alleenreg op die televisiestel in die voorhuis het, sal dié naweek moet skietgee.

Behalwe die Australiese tenniskampioenskappe, waarna vroue in groot getalle kyk, speel Suid-Afrika Saterdag in Londen in ʼn netbalwedstryd teen Australië.

Derduisende vroue sal na die regstreeks uitsending wil kyk, en net daarna na die wedstryd tussen Nieu-Seeland en Engeland.

Maar daar is darem genoeg rugby op meer geleë tye waarna die manne kan kyk wanneer hulle hul sitplekke terugkry. Boonop speel Suid-Afrika vroeg Saterdag in die Wêreldbekerreeks vir onder19-krieketspanne teen Nieu-Seeland.